Uşaqlarda hormonal balansı pozan məktəb ləvazimatları bunlar imiş — Çantasından uzaq tutun!
Məktəb mövsümü davam etdikcə valideynlərin ən çox diqqət yetirdiyi məqamlardan biri də dərs ləvazimatlarının seçimidir. Lakin rəngarəng və cəlbedici görünən bir çox məktəb ləvazimatı əslində uşaqların sağlamlığı üçün “gizli qatil” rolunu oynaya bilər.
Onlayn.media xəbər verir ki, mütəxəssislər uşaqların çantasına qoyulması qətiyyən tövsiyə edilməyən, toksik maddələrlə zəngin olan ləvazimatların siyahısını açıqlayıblar.
Araşdırmalar göstərir ki, siyahıda ilk yerdə kəskin qoxulu və rəngli pozanlar, həmçinin parlaq üzlüklü dəftərlər dayanır. Bu növ ləvazimatların tərkibində olan “ftalatlar” adlı kimyəvi maddələr uşaqların hormon balansına ciddi zərər vurur və gələcəkdə inkişaf ləngiməsinə səbəb ola bilər. Xüsusilə meyvə və ya konfet qoxulu pozanlar uşaqlarda allergiya və tənəffüs yolları xəstəliklərini tətikləyən əsas amillərdən biridir. Mütəxəssislər valideynləri daha sadə, qoxusuz və təbii tərkibli məhsullara üstünlük verməyə çağırır.
Digər bir təhlükə isə ucuz və keyfiyyətsiz plastik su qabları (mataralar) və plastik qələm qablarıdır. Bu məhsulların istehsalında istifadə olunan “Bisfenol A” (BPA) maddəsi uşaq orqanizminə daxil olaraq immuniteti zəiflədir və xərçəng riskini artırır. Həmçinin, tərkibində qurğuşun miqdarı yüksək olan bəzi rəngli qələmlər uşağın sinir sisteminə mənfi təsir göstərərək, onlarda diqqət dağınıqlığı və öyrənmə çətinliyi yaradır.
Həkimlər xəbərdarlıq edir ki, valideynlər ləvazimat alarkən mütəxəssis rəyi olan, üzərində “EN71” və ya “CE” sertifikatı olan məhsullara üstünlük verməlidirlər. Uşağınızın dərs zamanı tez-tez yorulması, baş ağrıları və ya dərisində yaranan qızartılar məhz çantasındakı həmin “zəhərli” ləvazimatların nəticəsi ola bilər. Unutmayın, uşağınızın sağlamlığı hər bir qiymətli ləvazimatdan daha önəmlidir.
Səkinə Yusifova/Onlayn.media
