Burun əməliyyatı öncəsi nələrə diqqət edilməlidir? – Mütəxəssislər xəbərdarlıq edir
Estetik və ya funksional məqsədlə icra edilən burun əməliyyatlarının uğurlu nəticə verməsi yalnız cərrahi müdaxilədən deyil, həm də əməliyyata qədərki hazırlıq mərhələsindən asılıdır. Mütəxəssislər bildirir ki, əməliyyatdan öncə diqqət edilməli olan bir sıra tibbi və gündəlik məqamlar mövcuddur.
Onlayn.media xəbər verir ki, ilk növbədə pasiyentin ümumi sağlamlıq vəziyyəti qiymətləndirilməlidir. Qan analizi, laxtalanma göstəriciləri, şəkər səviyyəsi və infeksiyaya dair testlər mütləq aparılmalıdır. Xüsusilə anemiya, laxtalanma pozğunluğu, diabet və xroniki xəstəliklər həkimə öncədən bildirilməlidir. Bu cür hallar əməliyyat zamanı və sonrasında risk yarada bilər.
Burun əməliyyatı öncəsi ən azı 10–14 gün əvvəl aspirin, bəzi ağrıkəsicilər və qan durulducu təsirə malik preparatların qəbulu dayandırılmalıdır. Eyni zamanda E vitamini, balıq yağı və bəzi bitki tərkibli əlavələr də qanaxma riskini artıra bildiyi üçün həkim məsləhəti olmadan istifadə edilməməlidir.
Siqaret və alkoqol istifadəsi əməliyyatdan əvvəl ciddi şəkildə məhdudlaşdırılmalıdır. Siqaret toxumaların sağalmasını ləngidir, infeksiya və tikiş problemləri riskini artırır. Mütəxəssislər əməliyyatdan azı iki həftə əvvəl və sonra siqaretdən tam imtinanı tövsiyə edirlər.
Qadın pasiyentlər üçün əməliyyat tarixi menstrual dövr nəzərə alınaraq planlaşdırılmalıdır. Menstruasiya günlərində aparılan cərrahi müdaxilələr qanaxma riskini artıra bilər. Həmçinin hamiləlik ehtimalı varsa, bu mütləq həkimə bildirilməlidir.
Əməliyyata psixoloji hazırlıq da mühüm amillərdən sayılır. Pasiyent nəticələrlə bağlı real gözləntilərə malik olmalı, burunun üz quruluşu ilə uyğunlaşmasının zaman alacağını bilməlidir. Həkimlə əvvəlcədən aparılan detallı məsləhətləşmə bu baxımdan xüsusi əhəmiyyət daşıyır.
Mütəxəssislər vurğulayır ki, burun əməliyyatı öncəsi qaydalara ciddi riayət edilməsi həm əməliyyatın təhlükəsizliyini artırır, həm də bərpa prosesinin daha rahat keçməsinə şərait yaradır.
Onlayn.media/Səkinə Yusifova
